Heimsókn umdæmisstjóra 109 A

Fundur var haldinn í Lionsklúbbi Seyðisfjarðar fimmtudaginn 21. október s.l.  Umdæmisstjóri 109A Kristín Þorfinnsdóttir frá Lionsklúbbnum Emblu á Selfossi heiðraði okkur með heimsókn sinni.  Formaður setti fundinn og gaf umdæmisstjóra orðið. Umdæmisstjóri flutti svo stórskemmtilegt og fróðlegt erindi þar sem hún kynnti sig og sitt embætti. Þá kynnti hún ýmis stefnumál Lionshreyfingarinnar og hvatti okkur til áframhaldandi góðra verka. Var gerður góður rómur að tölu hennar og henni klappað lof í lófa.  Önnur efni voru ekki á dagskrá fyrir utan að Adólf Guðmunsson skilaði af sér annálabókinni góðu. Hann var búinn að hafa hana á skrifborðinu sínu í hálft annað ár. Var því annállinn að vonum nokkuð langur. Adólfi mæltist vel og var í kjölfarið ákveðið að annálabókin myndi eftirleiðis ganga manna á millum (tekið upp eftir Össuri Skarphéðinssyni) eftir stafrófsröð. Er þetta væntanlega gert til að bókin lendi sjaldnar í höndum Adólfs. Fundi var slitið kl.20.15 eða þar um bil. Eftir sátu kokkurinn Sigurður Valdimarsson, sem hafði galdrað fram jólamat og tveir ónafngreindir uppvaskarar honum til aðstoðar. Næst á dagskrá þessarar heimasíðu er að uppfæra félagatal og leiðrétta embættismannatal en það bíður gleggri ákvörðunar stjórnar en nú liggur fyrir.                             

Athugasemdir

[Ómar B., 27.10.2010 kl. 13:45]

Fínn pistill frá fundinum hér fyrir ofan og mér fannst það hárrétt hjá félaga okkar Adolf að afhenta Árna bókina og láta hann tollafgreiða hana enda ekki vitað hvar í heiminum bókin góða hefur haldið sig síðasta eina og hálfa árið !

[Lárus Bjarnason, 28.10.2010 kl. 09:09]

Þetta er hárrétt athugað hjá Ómari. Enda reyndist stór hluti af pistlinum vera erlendis frá. Þetta hlýtur að flokkast undir innflutning. Spurning hvort það fellur undir tollfrjálsan farangur ferðamanns enda Addi á eilífu flandri.